فاكرين زمان ايام ما كان مفيش غير التليفزيون المصرى و حتى ده مكانش فيه اى حاجه
كان هو المسلسل بتاع الساعه 6 و النشرة بتاعة الساعه 9 و اهم
حاجه برنامج صباح الخير يا مصر اللى كنت بكرهه كره العمى لانى
كنت بصتبح بيه يوميا قبل ما انزل المدرسة
و اغنية يا حلو صبح يا حلو طل اللى لحد انهارده معرفش مين اللى
بيغنيها هى كانت بالنسبالى نذير انى لازم اخلص تحضير شنطتى بسرعه عشان الحق الطابور هههههههههههههههه
كل اللى افتكره ان واحد لابس لبس صيادين و واقف على مركب و بيغنى لواحده
انا من جيل بوجى و طمطم .. اللى كان احلى كرتون ممكن اشوفه .. كنت بعد استناه فى رمضان طول اليوم لحد المغرب عشان اشوفه
طبعا دلوقتى بسأل اخويا عليه تعرف بوجى و طمطم قالى اه ده حاجه عبيطة كده محصلش كرتون .. طبعا اخويا من جيل البوكيمون
اما انا
[ندعوك للتسجيل في المنتدى أو التعريف بنفسك لمعاينة هذه الصورة]انا من جيل عرف يعنى ايه مهرجان القراءة للجميع
بابا كان بياخدنا و نروحوا لحد معرض الكتاب فى القاهرة على الرغم من اننا كنا صغيرين اوى .. بس غرس فينا يعنى ايه قراءة و يعنى ايه قيمة الكتاب و قيمة انك تبقى قارئ و مطلع
انا و اخويا الكبير من جيل كان اللى فى سننا بيعدوا يلعبوا بالأتارى فى الوقت اللى احنا كنا بنحوش مصروفنا و ننزل كل اسبوع نشترى كتاب نقراه سوا
فضلنا سنين نقرا ملف المستقبل و رجل المستحيل
و نحلم ب (ن-1 ) و نتخيل ردود افعاله و نتسابق فى اللى يتخيل بقية الاحداث فى العدد القادم
احنا الجيل اللى لما اتطورت افلام الكرتون جالنا بكار ابو كف رقيق و صغير
[ندعوك للتسجيل في المنتدى أو التعريف بنفسك لمعاينة هذه الصورة]العابنا كانت المكعب و الميكانو
[ندعوك للتسجيل في المنتدى أو التعريف بنفسك لمعاينة هذه الصورة]البازل
[ندعوك للتسجيل في المنتدى أو التعريف بنفسك لمعاينة هذه الصورة]و اخر حاجه هى الاتارى اليدوى
[ندعوك للتسجيل في المنتدى أو التعريف بنفسك لمعاينة هذه الصورة]و مفيش مانع ان ماما تطلعلنا بنك الحظ و الليدو مرتين او 3 فى الشهر
[ندعوك للتسجيل في المنتدى أو التعريف بنفسك لمعاينة هذه الصورة]و بما اننا دايما نختلف عن الاخرون كان عندنا لعبة اسمها الطريق الى القدس تشبه شوية بنك الحظ و لكن مفيهاش فلوس فيها مقاتلين و جنود و البلدان كلها بلدان فلسطينية و المفروض ان الهدف اننا نوصل للقدس
ايه رأيكوا بقى .. ياترى مين من نفس الجيل ده ؟؟
